Um Umferðarráð

Umferðarráð var stofnað á grundvelli reglugerðar, sem Jóhann Hafstein dómsmálaráðherra setti og gekk í gildi 24. janúar árið 1969. Fyrsti formaður ráðsins var Sigurjón Sigurðsson, lögreglustjóri og gegndi hann stöðunni í tæplega 14 ár. Fyrsti framkvæmdastjóri ráðsins Pétur Sveinbjarnarson tók til starfa 15. júlí sama ár og var hann til að byrja með eini starfsmaður þess.
Aðsetur þessi fyrstu árin var í lögreglustöðinni við Hverfisgötu, en síðan flutti það í Gnoðarvog 44. Síðar flutti ráðið á Lindargötu 46.
Frá upphafi hefur Umferðarráð lagt áherslu á fræðslu um umferðarmál fyrir alla aldurshópa og fljótt var umferðarskólanum Ungir vegfarendur komið á fót og er hann að öllum líkindum fjölmennasti skóli landsins. Frá árinu 1979 hafa öll börn á landinu verið þátttakendur í umferðarskólanum.

Umferðarráð hefur átt frumkvæði að og tekið þátt í nokkrum mjög stórum verkefnum á landsvísu. Fyrst má þar nefna norræna umferðaröryggisárið, sem var stofnað 1983 og þá urðu einna fæst banaslys í umferðinni fram til þess, ef árið 1968 er undanskilið. Þá átti Umferðarráð stóran þátt í framkvæmd þjóðarátaks í umferðaröryggismálum, sem hófst árið 1988. Ári síðar var sala á áfengum bjór heimiluð hér á landi og var mikið gert til að vekja athygli á þeim hættum sem fylgja ölvunarakstri í tengslum við það. Árið 1989 samdi Umferðarráð við Skógrækt ríkisins um landssvæði fyrir aksturskennslusvæði í Kapelluhrauni við Hafnarfjörð. Ári síðar var fyrsta umferðarþingið haldið og umferðarljósið, viðurkenning fyrir mikilvægt starf í umferðaröryggismálum veitt í fyrsta sinn.

Árið 1992 voru málefni ökukennslu og ökuprófa falin Umferðarráði til umsjónar og sama ár var Útvarpi Umferðarráðs komið á fót. Það ár flutti Umferðarráð í Borgartún 33, þar sem það var til húsa til ársins 2002. Fyrsta umferðaröryggisáætlun Alþingis var samþykkt árið 1994. Ársþing alþjóðasamtaka umferðarráða PRI var haldin á Íslandi 1995 og þremur árum síðar var Rannsóknanefnd umferðarslysa stofnuð og var starfsemi hennar um árabil til húsa hjá Umferðarráði og síðar á Umferðarstofu. Rannsóknarráð umferðaröryggismála var stofnað árið 2000 og hefur styrkt mikinn fjölda rannsóknarverkefna, sem haft hafa gríðarleg áhrif á þróun umferðaröryggismála á Íslandi.

Árið 2002 var stofnunin Umferðarráð lögð niður og starfsemi hennar sameinuð Skráningastofnunni hf. og úr varð Umferðarstofa. Í ársbyrjun 2004 voru umferðaröryggismál síðan flutt frá dómsmálaráðuneyti til samgönguráðuneytis.

Helstu verkefni Umferðarráðs hafa verið:

• Slysaskráning.
• Umferðarfræðsla barna.
• Almenn umferðarfræðsla.
• Almenn upplýsingamiðlun um umferðarmál.Umsjón með ökunámi og ökuprófum í landinu.

Starfsmenn voru 20 til 23 þegar flest var.